Kur ishin vitet e para të profetësisë së të Dërguarit të Allahut (a.s.). Presioni dhe mizoria e ushtruar nga politeistët ndaj muslimanëve në Mekë u rrit dhe jeta u bë e padurueshme për besimtarët. Në një kohë kaq të vështirë, Allahu i Madhëruar zbriti suren Inshira, e cila përmban shumë lajme të mira dhe urtësi. Pejgamberi ynë (a.s.) u gëzua dhe u lehtësua kur zbriti kjo sure dhe dha lajmin e mirë se Allahu xh.sh., patjetër do të jepte lehtësi dhe qetësi pas çdo vështirësie.
Sot dëshiroj t’u drejtohem të gjithë vëllezërve dhe motrave tona që janë nënshtruar shtypjes në botë, veçanërisht në Palestinë, me mesazhet e sures Inshirah, që ngushëllojnë zemrat dhe ngjallin shpresë tek besimtarët:
A nuk ta hapëm Ne gjoksin tënd?
Dhe Ne hoqëm prej teje barrën tënde,
E cila shtypte shpinën tënde.
Dhe Ne, ta ngritëm lart famën tënde?
Surja Inshirah 1-4
Ne besojmë se Allahu, është i gjithëfuqishëm. Është Ai, që na rrethon me mëshirën dhe dhembshurinë e Tij. Është Ai që do të lehtësojë shtrëngimin në gjoksin tonë dhe do t’u japë paqe zemrave tona. Zoti i Plotfuqishëm, do të na heqë barrën e rëndë dhe do të na shpëtojë nga të gjitha vështirësitë dhe telashet.
Një nga të vërtetat që na kujton surja Inshirah është kjo:
E, pa dyshim se pas vështirësisë është lehtësimi.
Vërtet, pas vështirësisë vjen lehtësimi.
Surja Inshirah 5-6
Po, ne besojmë se pas çdo trishtimi do të ketë gëzim dhe pas çdo telashe do të ketë lehtësim. Sepse Allahu i Madhëruar, kurrë nuk i ka lënë vetëm pejgamberët dhe besimtarët. Ai kurrë nuk i la në mëshirën e shtypësve dhe armiqve. Po të hedhim një veshtrim më historinë e njerëzimit shohim se Allahu i ndihmoi besimtarët dhe pejgamberët.
Dhe së fundi, e shpëtoi dhe e ndihmoi pejgamberin tonë (a.s) nga torturat dhe mundimet e ndryshme të jobesimtarëve.
Të dashur besimtarë!
Surja Inshirah, gjithashtu na mëson këtë të vërtetë:
E kur ta kryesh (obligimin), atëbotë mundohu me adhurim (All-llahut).
Dhe, vetëm te Zoti yt përqëndro synimin!
Inshirah 7-8
Përtacia dhe pakujdesia nuk na përshtaten. Një besimtar nuk mund të jetë i papërgjegjshëm, neglizhues ose i vetëkënaqur. Ai përpiqet të jetojë, të mbajë gjallë dhe të përhapë të vërtetën, mirësinë, drejtësinë dhe mëshirën derisa të mbizotërojë mirësia në tokë çdo gjë do të shkojë mirë. Besimtari çdo gjë që bën e bën për pëlqimin e Allahut. Me forcën që merr nga besimi i tij, ai nuk e humb shpresën përballë vështirësive, ai punonë me të gjitha forcat për të ruajtur pavarësinë dhe të ardhmen.
Të dashur besimtarë!
Një nga mizoritë më të mëdha të dëshmuara në historinë njerëzore po ndodh sot në Palestinë, në Gaza. Njerëz të pafajshëm, duke përfshirë foshnjat, fëmijët, gratë dhe të moshuarit, vriten brutalisht. Shtëpitë, xhamitë, shkollat, madje edhe spitalet po bombardohen pa mëshirë. Një krim i madh kundër njerëzimit po kryhet para syve të gjithë botës. Ndërkohë që mijëra njerëz të pafajshëm po vdesin në të njëjtën kohë, bota që ka humbur mëshirën dhe ndërgjegjen e saj po shikon vetëm këtë gjenocid. Raca, gjuha dhe feja e të shtypurve nuk merren parasysh. Ftojmë të gjithë njerëzimin të qëndrojë me të shtypurit kundër shtypësit.
Të dashur besimtarë!
Pejgamberi ynë (a.s) thotë në një hadith:
Transmetohet nga Xhabiri r.a. se i Dërguari i All-llahut sal-lall-llahu alejhi ve sel-lem. ka thënë: “Ruajuni dhunës (padrejtësisë), sepse dhuna është errësirë në Ditën e Gjykimit, ruajuni koprracisë, sepse vërtet koprracia i ka shkatërruar ata popuj që kanë qenë para jush: ajo i ka shtyrë për derdhjen e gjakut të tyre dhe i ka shtyrë që ndalimet (haramet) t’i bëjnë të lejuara (hallall).” Transmeton Muslimi
Vështirësive që po përjetojnë muslimanët sot me siguri do të marrin fund dhe zullumqarët do të kenë një fund të hidhur si në këtë botë ashtu edhe në ahiret. Besimtarët patjetër do të triumfojnë me ndihmën e Allahut. Kohët e vështira që po kalojmë janë pararojë e ringjalljeve të reja. Përderisa ne si muslimanë veprojmë në unitet dhe solidaritet. Le ta bëjmë të përhershme vëllazërinë dhe dashurinë tonë. Të jemi të mëshirshëm me njëri-tjetrin, të urtë dhe të fortë kundër armikut. Të mos e humbim shpresën në mëshirën e Allahut. Le të përmbushim përgjegjësitë tona ndaj Zotit tonë, vëllezërve tanë dhe njerëzimit. Le të shpresojmë se Allahu, do t’i lehtësojë vështirësitë tona dhe do t’i kthejë vështirësitë tona në mëshirë. Ai na bëftë sërish lider dhe shembull për njerëzimin.
Dëshiroj që hytbën e sotme ta përfundoj me këtë ajet :
يَٓا اَيُّهَا الَّذ۪ينَ اٰمَنُٓوا اِنْ تَنْصُرُوا اللّٰهَ يَنْصُرْكُمْ وَيُثَبِّتْ اَقْدَامَكُمْ
O besimtarë, nëse ju ndihmoni (fenë) All-llahun, Ai ju ndihmon juve dhe u forcon këmbët tuaja.
Muhammed 7
