Bashkësia Islame e Kosovës organizoi iftar në qytetin e Ulqinit, duke mbledhur imamë, nëpunës të Bashkësisë Islame në Mal të Zi dhe xhematlinj. Ky iftar tashmë është bërë një traditë e përvitshme që forcon lidhjet vëllazërore dhe bashkëpunimin mes Bashkësive Islame.
Në këtë tubim, fjalën përshëndetëse e mbajti ndihmës Reisi Omer Kajoshaj, i cili falënderoi nikoqirin për organizimin dhe përkushtimin e treguar. Nga ana tjetër, Kryeimami i Kosovës, Vedat Sahiti, në fjalën e tij theksoi rëndësinë e unitetit dhe bashkëpunimit mes komuniteteve islame në rajon.
Të pranishëm në këtë iftar ishin edhe ndihmës Reisi Dr. Behlul Kanaqi, Kryetari i Kuvendit të Bashkësisë Islame në Mal të Zi, Isa Aloshi, Kryetari i Mexhlisit Blerim Bajraktari, Kryetari i Malësisë Shemsudin Lulanaj, Kryeimami Ali Bardhi, Kryeimami i Malësisë Xhevahir Arifaj, dekani i fakultetit të studimeve Islame dr. Islam Hasani, si dhe shumë imamë e besimtarë.
Pas iftarit, të pranishmit falën namazin e teravisë në Xhaminë e Detarëve, ku Kryeimami i Kosovës mbajti një ligjëratë frymëzuese mbi vlerat e Ramazanit dhe rëndësinë e solidaritetit mes besimtarëve.
Ky aktivitet është një dëshmi e marrëdhënieve të forta vëllazërore mes Bashkësive Islame të Kosovës dhe Malit të Zi, duke reflektuar frymën e harmonisë dhe bashkëpunimit në mesin e besimtarëve.
