Në Ulqin sot është falur namazi i xhenazes për Raxhep ef. Likën. Lika, ish-kryeimami i Mexhlisit të Bashkësisë Islame të Ulqinit, i cili gjatë jetës së tij ishte një shtyllë e vërtetë e Bashkësisë Islame. Namazi i xhenazes u fal në oborrin e shtëpisë së familjes, duke mbledhur besimtarë, miq dhe kolegë të shumtë që erdhën për t’i dhënë lamtumirën e fundit këtij udhëheqësi të nderuar fetar.
Namazi i xhenazes u drejtua nga Reisi i Bashkësisë Islame në Mal të Zi, Rifat ef. Fejziq, i cili theksoi se rahmetliu Raxhep ef. Lika ishte model i një imami të përkushtuar, sidomos në kohërat kur besimi po sprovohej.
Rahmetli Raxhep ef. Lika, gjatë gjithë karrierës së tij të gjatë shërbeu në vende të ndryshme, nga Pljevljanë veri, përmes Tuzit në pjesën qendrore, deri në Ulqin në jug, duke punuar gjithmonë për ruajtjen dhe forcimin e besimit. Reis Fejziq ka theksuar se Raxhep ef. Lika ishte një rojtar trim dhe dinjitoz i Islamit, i cili me krenari e veshi xhalmmën edhe pas daljes në pension, duke marrë pjesë vazhdimisht në të gjitha tubimet e rëndësishme të bashkësisë islame.
Në mesin e të pranishmëve në varrim ishte edhe Ahmed ef. Sadriu, sekretar i Bashkësisë Islame të Kosovës, i cili në emër të Bashkësisë Islame të Kosovës shprehu ngushëllime familjes dhe bashkësisë. Prezenca e tij theksoi më tej rëndësinë e të ndjerit Raxhep ef. Lika që kishte jo vetëm në Mal të Zi, por edhe në rajon më të gjerë.
Në varrim morën pjesë imamë dhe zyrtarë të shumtë të bashkësisë islame, si dhe besimtarë nga vende të ndryshme të vendit, të cilët erdhën për t’i bërë nderimet e fundit këtij njeriu të madh. Puna dhe kontributi i tij në bashkësi do të lërë gjurmë të pashlyeshme dhe kujtimi i përkushtimit dhe dashurisë së tij për Islamin do të mbahet mend përgjithmonë tek të gjithë ata që e njohën.
Rexhep (Haxhi) Lika u lind në vitin 1940 në fshatin Brajshe të Ulqinit. Shkollën fillore e kreu në Katërkoll në vitin 1956, hyri në Medresenë “Alaudin” në Prishtinë, të cilën e diplomoi në vitin 1960. Gjithashtu, ai u regjistrua në Universitetin Islamik “Bejda” në Libi, studimet iu ndërprenë për shkak të shpërthimit të revolucionit në atë vend.
Në vitin 1963 emërohet imam i Xhamisë Husein – Pasha në Pljevlja. Në vitin 1965 transferohet në detyrën e imamit në Tuzi, të cilën e mbajti deri në vitin 1987, kur u transferua në Ulqin, ku mban detyrën e imamit të xhamisë “Bregut”.
Në vitin 1998 u emërua imam i xhamisë “Namazgja”. Dy mandate ka qenë anëtar i Shoqatës së Shkencave të Malit të Zi, tre mandate antar i Kuvendit të Bashkësisë Islame në Mal të Zi dhe një mandat antar i Kuvendit Suprem të Bashkësisë Islame në RSFJ. Ai ishte pjesëmarrës aktiv në heqjen e gjakmarrjes në Malesi gjatë shërbimit të tij në Tuz. Ai e kreu Haxhin shtatë herë dhe shërbeu si kryeimam i Mexhlisit të Bashkësisë Islame të Ulqinit nga viti 1998 deri në pensionimin e tij në vitin 2010.
Lusim Allahun e Madhëruar që t’i dhurojë një xhenet të bukur dhe familjes së tij sabër.
